Disa qytetarë janë ankuar se për rreth një muaj ka mungesë të insulinave në vend.

Ata ankesat e tyre i kanë dërguar në redaksi të Telegrafit, për të cilën thonë se kjo mungesë është duke iu shkaktuar shqetësim të madh, pasi insulinat duhet të përdoren rregullisht.

Njëri nga qytetarët tha se insulinat nuk janë duke u gjendur as nëpër farmacitë e vendit.

“Një muaj jemi pa insulina. As me i ble s’po gjinden. Pa insulinë nuk mund të jetojmë as 24 orë e leje më shumë”, tha ky qytetar.

Ankesa për mungesë të insulinave janë raportuar edhe nga disa qytetarë tjerë.

Për këtë shqetësim të tyre, Telegrafi ka kontaktuar Sami Ukën, këshilltar politik i ministrit të Shëndetësisë Arben Vitia, i cili tha se për këtë pyetje sot do të përgjigjet ministri në Kuvendin e Kosovës.

“Është pyetje parlamentare, ministri do të përgjigjet sot në Kuvendin e Kosovës”, ka thënë Uka për Telegrafin.