Mund ta dini se vitamina D është një element ushqyes që ju ndihmon në përthithjen e kalciumit duke i bërë kockat më të forta, por në fakt vitamina D është një kategori që përfshin disa përbërje kimike të ndryshme. Përbërjet kimike më të zakonshme të vitaminës D janë vitamina D2 dhe vitamina D3, të cilat vijnë nga burime të ndryshme natyrore.
Mjekët zakonisht shkruajnë në recetë suplementet e vitaminës D2 nëse keni mungesë të vitaminës D por disa ekspertë pohojnë se trupi e ka më të lehtë të përthithë vitaminën D3 e për rrjedhojë mund të jetë më efektive në fuqizimin sistemi imunitar. Më poshtë do të gjeni informacionet e nevojshme për të bërë dallimin midis vitaminës D2 dhe vitaminës D3.
Çfarë është vitamina D?
Vitamina D në fakt nuk është një vitaminë por një hormon që ndikon në shumë nga funksionet e rëndësishme në trup.
Nutricionistët pohojnë se vitamina D është e thelbësore për një shëndet të mirë.
Rreth 10% e vitaminës D në trupin tuaj vjen nga ushqimet që hani në formën e D2, ndërsa 90% prodhohet brenda trupit tuaj në formën e D3.
Rëndësia e vitaminës D
Si D2 dhe D3 janë njësoj të rëndësishme për mirëqenien e shëndetit.
Ndihmojnë në përthithjen e kalciumit:
Veshkat e konvertojnë vitaminën D në formë aktive që luan rol të rëndësishëm në rregullimin e niveleve të kalciumit në gjak. Vitamina D ndihmon trupin të përthithë kalciumin dhe fosforin që janë të dy të rëndësishëm për të pasur kocka të shëndetshme dhe për të ulur riskun e osteoporozën (densitet i ulët i kockave) përgjatë jetës.
Fuqizon sistemin imunitar:
Vitamina D është gjithashtu e rëndësishme për mirëfunksionimin e sistemit imunitar. Njerëzit me mungesë të vitaminës D i luftojnë infeksionet me vështirësi dhe janë më të predispozuar të vuajnë nga çrregullimet autoimune.
Mund t’ju ndihmojë të parandaloni kancerin:
Disa studime tregojnë për një lidhje mes niveleve të larta të vitaminës D dhe një risku të ulët të kancerit kolorektal. Megjithatë studimet janë shumë kontradiktore, ndaj është e nevojshme të kryhen më shumë studime për të parë sesi ndikon vitamina D në riskun e kancerit.
Nga ndryshon Vitamina D2 nga Vitamina D3?
Ashtu si njerëzit edhe bimët prodhojnë vitaminë D kur janë të ekspozuar në dritën e diellit. Bimët prodhojnë më shumë vitaminë D2 ndërsa kafshët prodhojnë vitaminë D3. Për këtë arsye këshillohet më shumë përdorimi i suplementeve me vitaminë D3 në vend të atyre D2 duke qenë se janë më efektive në rritjen e nivelit të vitaminës D në gjak. Kjo sepse organizmi shpërbën më shpejt vitaminën D2 e për rrjedhojë nuk qëndrojnë gjatë në trup.
Një studim i vitit 2011 zbuloi se vitamina D3 ishte 97% më efektive në rritjen e nivelit të vitaminës D në gjak krahasuar me D2. Vitamina D3 gjithashtu depozitohet në mënyrë më efektive në indin dhjamor.
Një tjetër studim i vitit 2015 zbuloi se ndërsa vitamina D2 dhe D3 ishin efektive në rritjen e nivelit të vitaminës D, njerëzit që merrnin vitaminë D3 rezultuan të kishin nivel më të lartë të vitaminës D për 77 ditë pasi kishin ndërprerë marrjen e suplementeve.
Burimet e vitaminës D2 dhe D3
Sasinë më të madhe të vitaminës D e marrim prej diellit por një pjesë tjetër të saj mund ta përftojmë edhe nga dieta ushqimore. Disa nga ushqimet nga ku mund të merrni vitaminën D3 janë:
– Peshku (zakonisht troftë, salmon, sardele, merluci)
– E verdha e vezës
– Mëlçi viçi
Vitamina D2 mund të gjendet tek:
– Kërpudhat si portobella dhe shitake veçanërisht kërpudhat që kanë qenë të ekspozuara në diell për një kohë të gjatë.
– Ushqimet që janë të fortifikuara me vitaminën D si qumështi dhe drithërat.
Në përfundim
Është e pamundur të merrni sasi të mjaftueshme të vitaminës D vetëm nëpërmjet dietës ushqimore si dhe është e vështirë të merrni rregullisht rreze dielli. Prandaj nëse dëshironi të merrni një suplement për të fuqizuar nivelin e vitaminës D, një zgjedhje më e mirë do të ishte përdorimi i vitaminës D3 sepse ajo mund të ketë një efekt më të fortë dhe më jetë-gjatë në rritjen e nivelit të vitaminës D. Gjithashtu duhet të keni kujdes të mos e tejkaloni dozën sepse mund të rezultojë në toksicitet të vitaminës D e cila më pas mund të shkaktojë të përziera dhe të vjella, probleme me veshkat, depresion dhe grumbullimin e kalciumit në enët e gjakut dhe organet vitale.
Mjekët sugjerojnë marrjen e vitaminës D gjatë dimrit, duke ruajtur dozën ditore me 600 IU. Kjo është e rëndësishme veçanërisht për njerëzit që kanë risk të lartë për mungesë të vitaminës D siç janë të moshuarit, grupet etnike të njerëzve me ngjyrë, gratë shtatzëna dhe gratë që ushqejnë fëmijët me gji.
