Studimi i ri ka zbuluar se konsumuesit e birrës shpesh kanë dieta dhe stil jetese më të keq sesa ata që pinë verë, alkool të fortë, liker apo kombinim të këtyre.
Konsumuesit e birrës kanë pasur pikët më të ulëta në indeksin e ushqyerjes së shëndetshme duke marrë vetëm 49 pikë nga 100 gjithsej. Ky indeks e mat cilësinë e dietës së një personi, ka shkruar The New York Post.
Ata që konsumojnë verë arritën pikët më të larta, 55, ndërsa ata që konsumonin vetëm alkool të fortë ose një kombinim të alkoolit arritën rreth 53.
Ata që pinë birrë gjithashtu kishin zakone më të këqija ushqimore, konsumonin duhan, ushtroheshin më pak dhe konsumonin më shumë kalori krahasuar me grupet e tjera.
Pse ata që konsumojnë birrë kanë dietë më të keqe?
Demografia: Personat që pinë birrë shpesh janë më të rinj, burra, dhe prej grupeve me të ardhura më të ulëta, faktorë që mund të ndikojnë në zakonet e tyre të të ngrënit dhe të jetesës.
Dieta: Ata që pinë birrë janë më të prirur të konsumojnë ushqime më shumë karbohidrate, mish të përpunuar dhe ushqime me pak fibra. Nga ana tjetër, ata që pinë verë priren të konsumojnë vakte më të balancuara me mish, perime dhe qumësht.
Doktoresha Madeline Novack, autorja kryesore e studimit, shpjegoi se birra mund të jetë më e popullarizuar në zona ku njerëzit konsumojnë dieta të pasura me ushqime të përpunuara, gjë që mund të shpjegojë edhe zakonet e këqija ushqimore të atyre që konsumojnë birrë.
“Ushqimet e skuqura ose të kripura mund të nxisin konsumimin e birrës”, ka thënë ajo.
Alkooli dhe rreziqet për shëndetin:
Novack gjithashtu ka theksuar lidhjen mes abuzimit me alkoolin dhe sëmundjeve të mëlçisë, si cirroza.
Ajo ka thënë se sëmundjet e mëlçisë shpesh lidhen me një dietë të keqe dhe konsumimin e alkoolit.
“Ndryshimet në stilin e jetesës janë thelbësore për menaxhimin dhe parandalimin e këtyre problemeve”, ka thënë doktoresha, duke inkurajuar njerëzit të diskutojnë zakonet e tyre të konsumimit të alkoolit me mjekët.
Këshilla për shëndetin
Dietologia e regjistruar Stephanie Schiff ka thënë se, megjithëse alkooli, veçanërisht verë e kuqe, dikur ishte menduar si i shëndetshëm, “dukshëm duket më pak i tillë tani”.
Ajo ka rekomanduar se njerëzit duhet të konsumojnë sa më pak alkool dhe të fokusohen në një dietë të shëndetshme, të bazuar kryesisht në ushqime të plota dhe bimore për shëndet më të mirë.
Novack do të prezantojë gjetjet e saj në një konferencë të organizuar nga Shoqata Amerikane për Studimin e Sëmundjeve të Mëlçisë. Megjithatë, studimi ka disa kufizime, pasi pjesëmarrësit raportuan zakonet e tyre të të ngrënit dhe konsumimit të pijes, që mund të mos jenë gjithmonë të sakta.
Ndërkohë që birra mund të jetë pije e popullarizuar, ajo është e lidhur me zakone të këqija të dietës dhe stilit të jetesës krahasuar me lloje të tjera të alkoolit. Përdorimi me masë dhe ushqimi i shëndetshëm janë thelbësore për shëndet më të mirë.
