Kanceret e lidhura me duhanin kanë arritur një rekord të lartë me 160 persona të diagnostikuar çdo ditë, tregojnë shifrat e reja.

Ka pasur një rritje prej 17 për qind të rasteve gjatë dy dekadave të fundit me kanceret e mëlçisë, fytit dhe veshkave që janë dyfishuar në këtë kohë, sipas analizave nga Cancer Research në Mbretërinë e Bashkuar.

Ndërsa normat e duhanpirjes po bien, popullsia në rritje do të thotë se ka ende rreth 6.4 milionë duhanpirës atje.

Organizata bamirëse po i bën thirrje qeverisë së re që të vazhdojë me Projektligjin e Tories’ ”Tobacco and Vapes”, duke e rifutur atë në fjalimin e parë të Mbretit më vonë këtë muaj.

Projektligji i Duhanit dhe Vapes 2023-24 (Tobacco and Vapes), sipas Daily Mail, përmbush një sërë propozimesh të qeverisë britanike për të krijuar një “brez pa duhan” dhe për të zvogëluar tërheqjen dhe disponueshmërinë e vapave për të rinjtë.

Dr Ian Walker, drejtor ekzekutiv i politikave në Cancer Research BM, tha se ”Çdo orë, jetët e gjashtë familjeve ndryshojnë përgjithmonë nga një sëmundje që mund të ishte parandaluar”.

”Pirja e duhanit është një produkt konsumi unik toksik dhe nuk ka vend në të ardhmen tonë”.

”Rritja e moshës së shitjes së produkteve të duhanit do të jetë një nga ndërhyrjet më të mëdha të shëndetit publik në kujtesën e gjallë, duke e vendosur Mbretërinë e Bashkuar si një lider botëror”.

”Është jetike që ky projektligj të rifutet në Fjalimin e Mbretit, të miratohet dhe të zbatohet plotësisht, në mënyrë që ndikimi i pirjes së duhanit të kalojë në librat e historisë”.

Të dhënat nga bamirësia tregojnë se kishte rreth 57,600 diagnoza të kancerit të shkaktuar nga pirja e duhanit në vitin 2023, krahasuar me 49,325 në 2003 në Mbretërinë e Bashkuar.

Dihet se duhani shkakton 16 lloje të ndryshme kanceri, ku vetëm kanceri i mushkërive shkakton 33,000 raste në vit.