Është shumë e zakonshme në verë, kur zgjidhni të hani një akullore ose të pini një granitë të freskët, të ndjeni papritur një dhimbje intensive, shpuese në kokë, veçanërisht pas syve, e njohur edhe si “ngrirja e trurit”.

Kjo ndodh sepse kur hani ose pini diçka të ftohtë, temperatura e qiellzës suaj bie dhe enët e gjakut ngushtohen nga ftohja.

Pothuajse menjëherë pas kësaj, enët e gjakut zgjerohen dhe gjaku nxiton në atë zonë, ndërsa trupi juaj përpiqet të rregullojë temperaturën e tij, pra të ngrohet. Ky zgjerim i papritur i arterieve transmetohet në tru si dhimbje nëpërmjet nervit trigeminal, i cili degëzohet në mes të fytyrës dhe ballit, shpjegojnë ekspertët.

Në fakt, fëmijët dhe njerëzit e prirur ndaj migrenës kanë një rrezik më të lartë për të përjetuar një dhimbje koke të shkaktuar nga i ftohti, sipas ekspertëve nga Johns Hopkins Medicine.

Çfarë duhet bërë kur të ndodhë?

Lajmi i mirë është se ngrirja e trurit zgjat më pak se pesë minuta në 98 për qind të njerëzve.

Megjithatë, ka disa gjëra që mund të bëni për ta përshpejtuar dhe për të marrë lehtësim më të menjëhershëm:

-Shtypni gjuhën ose gishtin e madh në çatinë e gojës.

-Pini një gotë ujë në temperaturën e dhomës.

Të dyja do të ndihmojnë në transferimin e nxehtësisë në qiellzën tuaj dhe për ta rikthyer temperaturën e gojës në normale, thonë ekspertët.