Kur shfaqet kanceri i prostatës, një pyetje është parësore: A është ai agresiv dhe kërkon trajtim të menjëhershëm, apo me rritje të ngadaltë dhe i denjë vetëm për t’u monitoruar?

Tani për tani, një biopsi invazive është mënyra e vetme për t’iu përgjigjur kësaj pyetjeje, por studiuesit thonë se kanë zhvilluar një test të urinës që mund të bëjë punën në vend të kësaj.

Testi, i quajtur MyProstateScore2.0 (MPS2), u zhvillua nga studiues në Universitetin e Miçiganit në ShBA,  të cilët raportuan gjetjet e tyre të enjten në revistën JAMA Oncology.

“Nëse jeni negativ në këtë test, është pothuajse e sigurt që nuk keni kancer agresiv të prostatës”, tha Dr. Arul Chinnaiyan, profesor i patologjisë dhe urologjisë në Michigan Medicine.

Qasja ndaj kujdesit ndaj kancerit të prostatës ka ndryshuar rrënjësisht gjatë dekadave të fundit, vuri në dukje bashkautori i studimit, Dr. John Wei.

“Njëzetë vjet më parë, ne po kërkonim për çdo lloj kanceri të prostatës”, tha Wei, profesor i urologjisë në universitet. “Tani, ne e kuptojmë se kanceri me rritje të ngadaltë nuk ka nevojë të trajtohet. Papritur, loja ndryshoi. Kaluam nga nevoja për të gjetur ndonjë kancer në gjetjen e vetëm kancerit të rëndësishëm”.