Ministri i Shëndetësisë, Arben Vitia ka thënë se të vaksinuarit në Kosovë nuk kanë pasur asnjë efekt anësor deri më tani.

Gjatë konferencën për medie në Qendrën e Vaksinimit, në sallën “1 Tetori”, Vitia tha se deri më tani ekipa emergjente nuk kanë pasur raste të ankesave nga personat të cilët janë vaksinuar.

“Të gjithë qytetarët dhe personalie shëndetësor nuk ka pasur asnjë efekt anësor apo efekt të padëshirueshëm që do të mobilizonte epiken mjekësore emergjente. Ata kanë pasur më së paku punë, që është lajm i mirë pasi vaksina deri më tani te askush nuk ka pasur efekte anësore”, theksoi Vitia.

I pyetur në lidhje me ardhjen e kontingjentit tjetër të vaksinave në Kosovë, Vitia theksoi se ato sipas komunikimeve me COVAX-in, pritet të arrijnë në fund të këtij muaji, ose në fillimin të muajit maj.

“Kontingjenti i dytë pritet të vijë nga fundi i prillit ose fillimi i majit. Këto janë fjalët të cilat i kemi nga COVAX-i. Koha për vaksinimin me dozën e dytë, ashtu siç u shkruan edhe atyre që e kanë marrë vaksinën pra dozën e parë, është qershori, pra konsideroj se jemi në kohë”, theksoi Vitia.