Enj, Maj 19, 2022
Banner Top
Banner Top
ShSKUK tregon sa operacione janë kryer në vitin 2021

Deputeti i Partisë Demokratike të Kosovës, Bekim Haxhiu, ka shprehur shqetësim lidhur me situatën aktuale në Shërbimin Spitalor Klinik Univeristar të Kosovës, duke thënë se në vitin 2021 janë kryer 20 mijë operacione më pak në ShSKUK. Por, nga ShSKUK i kanë demantuar pretendimet e deputetit Haxhiu.

“Pra, 20 mijë operacione janë më pak në sektorin publik dhe janë 20 mijë operacione më shumë në sektorin privat dhe kjo ka kosto miliona euro, dikush ka përfituar”, ka thënë deputeti Haxhiu në Komisionin Parlamentar për Shëndetësi dhe Mirëqenie Sociale.

Ndaj konstatimeve të Haxhiut ka reaguar ShSKUK, duke njoftuar opinionin se në nivel të SHSKUK gjatë vitit 2021 janë realizuar gjithsej 33, 666 operacione, që përbën rreth 7,000 operacione më pak se në vitin 2019 (në kohën para pandemisë), ndërsa krahasuar me vitin 2020 janë rreth 7,500 operacione më shumë në vitin 2021.

“Kosova gjatë vitit 2021 është përballur me 2 valët më të ashpra të pandemisë COVID-19; kështu, krahas menaxhimit me sukses të pandemisë COVID-19, ShSKUK ka arritur që gjatë vitit 2021 të realizoi numër të konsiderueshëm të intervenimeve kirurgjikale”, thuhet në njoftim, transmeton Telegrafi.

“Po ashtu, kryerja e operacioneve të natyrës urgjente, emergjente dhe rastet me  sëmundje të rënda (tumorët) nuk është ndërprerë në asnjë fazë të pandemisë”, ka njoftuar ShSKUK.

Në Komisionin Parlamentar për Shëndetësi janë shprehur shqetësime rreth listave të pritjes në kuadër të shërbimit Spitalor Klinik Universitar dhe janë adresuar kritika rreth bordit të këtij institucioni, për çka disa deputetë kanë kërkuar edhe shkarkimin e kryesueses së bordit të ShSKUK-së

Arkiva

Kategoritë