Albina Selmanaj

Hemofilia është një çrregullim i koagulimit të gjakut. Shumë faktor koagulues që ndodhen në plazëm (produkt gjaku) punojnë së bashku për të formuar mpiksjen, pra ndalimin e gjakderdhjes. 

Pacientët me hemofili kanë simptoma të tilla si gjakderdhje spontane pas një lëndimi, nxjerrje dhëmbi, operimi kirurgjikal me hematoma në trup, ajtje dhe dhimbje të artikulacioneve të trupit, të gjunjëve, bërrylave, gjakderdhje në urinë dhe jashtëqitje dhe gjakderdhje nga hunda pa asnjë shkak.

Fatkeqësisht pacientët që vuajnë nga kjo sëmundje në Kosovë, nuk kanë një qendër të hemofilisë për të marrë shërbime dhe trajtime për këtë sëmundje.

Në një intervistë për Familjajonë, Hematologu, Fitim Gashi tha se për momentin mungon një qendër ku pacientët me hemofili mund të marrin shërbime dhe trajtime për këtë sëmundje, por që këta pacientë janë duke u trajtuar në dy klinika të tjera në Qendrën Klinike dhe Universitare të Kosovës.

“Trajtimi i pacientëve me hemofili kërkon kushte të mira hospitalore dhe për momentin mungon një qendër e hemofilisë ku pacientët mund t’i marrin këto shërbime. Për shkak të moshës pacientët me hemofili janë duke u trajtuar në dy klinika, në Klinikën e Pediatrisë – reparti Hematoonkologji dhe klinikën e Hematologjisë.”, tregoi Gashi.

Sipas Hematolgut Gashi, ka disa lloje të ndryshme të hemofilisë mirëpo llojet më të shpeshta të hemofilisë janë Hemofilia A dhe Hemofilia B.

“Kemi disa lloje të hemofilisë, por më të shpeshtat janë hemofilia A (mungesa e faktorit te 8 ) dhe hemofilia B (mungesa e faktorit te 9 ). Llojet tjera të hemofilisë janë mungesa e faktorit II V V+VIII VII X XI XIII. “, informoi Gashi

Ndërkaq, gjinia më e prekur nga sëmundja e hemofilisë sipas dr. Gashi është ajo mashkullore, kjo për shkak se kjo sëmundje është gjenetike.

“Për shkak se hemofilia është sëmundje gjenetike ndodh më shumë te meshkujt , kjo ndodh për shkak të ndryshimeve gjenetike në kromozomin X sepse mashkulli ka një kromozom X, ndërsa femra ka dy kromozome X, si rezultat shansi për paraqitje të hemofilisë është 50% kur nëna biologjike është bartëse e gjenit të çrregulluar. Nëse e trashëgojnë gjenin e afektuar kromozomal.”, tha Gashi.

Personat e lindur me hemofili do ta kenë atë përgjatë gjithë jetës. Nuk është një sëmundje e shërueshme, por patjetër që trajtohet sipas protokolleve të përcaktuara.