Sipas një sondazhi, një shumicë e kroatëve nuk kanë në planë të marrin një vaksinë për t’u imunizuar kundër koronavirus sapo të jetë në dispozicion.

Dhe sipas një shkrimi të Al Jazeera, përcjell Telegrafi, rezultatet e sondazhit të Kroacisë pasqyrojnë një trend më të gjerë në të gjithë botën.

Një hezitim për të marrë një vaksinë të koronavirusit duket se po rritet, sipas një raporti këtë muaj nga Forumi Ekonomik Botëror (WEF) i cili zbuloi se më pak njerëz thonë se do të merrnin një vaksinë COVID-19 tani sesa tre muaj më parë.

Studimi i tij Ipsos mbi besimin e vaksinave tregon se mesatarisht në 15 vende, “dëshira” për tu vaksinuar është ulur me katër pikë përqindje që nga gushti.

Sondazhi tregon se 73 për qind e të rriturve pajtoheshin fuqimisht ose disi se “nëse do të ishte në dispozicion një vaksinë për COVID-19, unë do ta bëja atë”.

Tre muaj më parë shifra ishte 77 për qind.

Dhe “dëshira” për vaksinim ka rënë në 10 nga vendet – mbi të gjitha në Kinë, Australi, Spanjë dhe Brazil.

Më shumë se katër në pesë persona në Indi, Kinë, Kore të Jugut dhe Brazil, megjithatë, thonë se do të merrnin një vaksinë nëse ishte e disponueshme – krahasuar me pak më shumë se gjysmën në Francë dhe rreth dy të tretat në Shtetet e Bashkuara, Spanjë, Itali, Afrikën e Jugut, Japoni dhe Gjermani.

Ndërkohë, 34 për qind e atyre që hezitojnë të marrin një vaksinë në mbarë botën thanë se ishin të shqetësuar për efektet anësore ndërsa 33 për qind të tjerë thanë se provat klinike po lëviznin shumë shpejt.

Ekspertët vlerësojnë se të paktën 70 për qind e popullsisë do të duhet të jetë imune ndaj coronavirusit në mënyrë që të ndalojë përhapjen e një sëmundjeje që deri më tani ka vrarë pothuajse 1.4 milion njerëz në të gjithë botën.

Por për ta bërë këtë, besimi i publikut në një vaksinë duhet të jetë veçanërisht i lartë dhe mungesa aktuale mund të jetë e mjaftueshme për të kufizuar efikasitetin.