Diabeti, një sëmundje kronike që prek miliona njerëz në mbarë botën, mund të menaxhohet dhe, në shumë raste, të parandalohet përmes ndryshimeve të thjeshta në stilin e jetesës.

Në Ditën Botërore të Diabetit, ju sjellim këshillat më të rëndësishme për të mbajtur diabetin larg dhe për të përmirësuar cilësinë e jetës:

Tipet e Diabetit sipas OBSh dhe Këshilla për Menaxhim
Diabeti Tip 1: Gjendje autoimune që ndalon trupin nga prodhimi i insulinës dhe nuk mund të parandalohet.
Diabeti Tip 2: Shpesh i parandalueshëm përmes një stili jetese të shëndetshëm. OBSh këshillon:
– Të mbani një peshë të shëndetshme
– Të qëndroni aktivë fizikisht
– Të ushqeheni shëndetshëm
– Të lini duhanin

Diabeti Gjatë Shtatzënisë: Mund të zhvillohet gjatë shtatzënisë për shkak të mungesës së insulinës, por zakonisht kalon pas lindjes.

Parandalimi dhe Kujdesi i Hershëm
Kontrollet e rregullta dhe analizat e gjakut me një profesionist shëndetësor janë vendimtare për diagnostikimin e hershëm. Kjo ndihmon në parandalimin e komplikacioneve dhe ruajtjen e shëndetit.

Rëndësia e Ushqimit për Parandalimin dhe Menaxhimin e Diabetit
Dieta është një faktor i rëndësishëm në menaxhimin e niveleve të sheqerit në gjak dhe për parandalimin e komplikimeve të diabetit. Një dietë e shëndetshme dhe e mirëbalancuar mund të ndihmojë jo vetëm në ruajtjen e peshës, por edhe në stabilizimin e glukozës në gjak.

Ja disa udhëzime për një dietë të përshtatshme për diabetin nga nutricionistja Albulena Shabani-Ilazi:

Konsumi i Karbohidrateve Kompleks: Zgjidhni karbohidrate komplekse, si drithërat e plota, patatet, dhe bishtajoret, të cilat treten më ngadalë dhe ndihmojnë në mbajtjen e niveleve të qëndrueshme të sheqerit në gjak.

Ushqime të Pasura me Fibrë: Fibrat nga perimet, frutat, dhe drithërat e plota ndihmojnë në ngadalësimin e përthithjes së sheqerit dhe mbajtjen e nivelit të glukozës të stabilizuar. Fibrat gjithashtu ndihmojnë në menaxhimin e peshës.

Proteina të Shëndetshme: Konsumi i proteinave nga burime si peshku, mishi i bardhë, arrat dhe fasulet mund të ndihmojë në ndjenjën e ngopjes dhe të mbajë në kontroll sheqerin në gjak.

Kufizimi i Ushqimeve të Rafinuara dhe Sheqernave të Shtuara: Ëmbëlsirat, pijet e gazuara dhe ushqimet e përpunuara mund të shkaktojnë rritje të shpejtë të sheqerit në gjak. Ndërrimi i këtyre ushqimeve me alternativa të shëndetshme është thelbësor për të mbajtur diabetin në kontroll.

Uji si Zgjedhja Kryesore e Pijes: Pini sa më shumë ujë dhe shmangni pijet e ëmbla, të cilat ndikojnë drejtpërdrejt në rritjen e sheqerit në gjak dhe në shtimin e kalorive të panevojshme.

Rëndësia e Dietës Fasting: Dieta fasting, ose agjërimi i ndërprerë, mund të ndihmojë në përmirësimin e ndjeshmërisë ndaj insulinës dhe në kontrollin e niveleve të sheqerit në gjak. Kjo metodë përfshin periudha të caktuara të agjërimit dhe ushqimit, dhe mund të jetë efektive për disa individë në menaxhimin e diabetit.

Duke ndjekur një dietë të balancuar dhe të pasur me përbërës të freskët dhe ushqime natyrale, mund të përmirësoni menaxhimin e diabetit dhe të zvogëloni rrezikun e komplikimeve afatgjata. Zgjedhjet e përditshme dhe kujdesi për veten janë çelësi për të shmangur diabetin dhe për të jetuar një jetë më të shëndetshme.