Gjatë ditës së djeshme ka ndodhur një rast vrasjeje në familje, ku babai ka qëlluar me armë djalin e tij, pas një mosmarrëveshjeje që patën mes vete.

Viktima A.K. ishte biznesmen i njohur dhe ishte menaxher disa prej këngëtarëve në estradën kosovare.

Rastin për këtë vdekje e ka konfirmuar edhe Policia e Kosovës, ku, në një prononcim për Telegrafin, kanë thënë se të dyshuarit për vrasje iu është konfiskuar një armë.

“Rreth orës 17:00 policia ka marrë informatën për një vrasje të ndodhur në rrugën ‘Ndue Perlleshi’ në Prishtinë. Menjëherë pas marrjes së informatës policia ka dalë në vendin e ngjarjes dhe po ndërmerr të gjitha veprimet e nevojshme që konsistojnë në hetimin e rrethanave që karakterizojnë ngjarjen. Një person është arrestuar si dhe është konfiskuar një armë që dyshohet të jetë arma e përdorur në rast”, kanë thënë ata.

Në vendin e ngjarjes, ditën e mërkurë, kishte dalë edhe Prokuroria e Prishtinës, dhe Instituti i Mjekësisë Ligjore dhe Forenzika, ku pas disa orëve hetime, trupi i viktimës ku largua nga vendi i ngjarjes dhe u dërgua në Institut.

Nga Prokuroria kanë bërë të ditur se rasti është cilësuar si vrasje e rëndë.

“Prokurori kujdestar i Departamentit te Krimeve te Renda, ka dalë në vendin e ngjarjes. Rasti është cilësuar ‘Vrasje e rendë’. Prokurori i Shtetit, ka ndaluar një të dyshuar për kryerjen e kësaj vepre penale. Trupi i pajetë është dërguar në Institutin e Mjekësisë Ligjore për obduksion. Në bashkëpunim me Policinë janë duke u ndërmarrë të gjitha veprimet e nevojshme hetimore, për zbulimin e rrethanave të kësaj ngjarje”, ka thënë zëdhënësja e Prokurorisë së Prishtinës, Laureta Ulaj.