Albina Selmanaj

Për të kuptuar më mirë pasojat e mosmjekimit të sëmundjeve të tiroides, FamiljaJonë ka intervistuar Dr. Almedin Ramizin, specialist i endokrinologjisë, i cili ndau disa nga rreziqet kryesore që lidhen me këtë problem.

INTERVISTA:

Familja Jonë: Dr. Ramizi, çfarë pasoja mund të ketë mosmjekimi i sëmundjeve të tiroides?

Dr. Almedin Ramizi: Sëmundjet e tiroides, nëse nuk trajtohen me kohë, mund të shkaktojnë probleme serioze në organizëm. Ato ndikojnë në shumë sisteme trupore, si ai kardiovaskular, nervor, riprodhues dhe kockor. Varësisht nëse kemi të bëjmë me hipotiroidizëm apo hipertiroidizëm, pasojat ndryshojnë, por të dyja mund të jenë të rënda.

Familja Jonë: Le të fillojmë me hipotiroidizmin. Çfarë ndodh kur kjo gjendje nuk trajtohet?

Dr. Almedin Ramizi: Hipotiroidizmi i pamjekuar ngadalëson funksionet trupore. Pacientët përballen me lodhje, depresion, rritje të kolesterolit, rrahje të ngadalta të zemrës dhe humbje të kujtesës. Tek gratë mund të shkaktojë cikle menstruale të çrregullta, infertilitet dhe madje edhe aborte spontane. Në raste të rënda, mund të zhvillohet myxedema, një gjendje e rrezikshme që shoqërohet me ënjtje dhe lëkurë të trashë.

Familja Jonë: Po për hipertiroidizmin?

Dr. Almedin Ramizi: Hipertiroidizmi, përkundrazi, përshpejton proceset trupore. Kjo gjendje mund të shkaktojë aritmi, rrezik të lartë për infarkt, osteoporozë dhe një krizë të quajtur tirotoksikozë, që është emergjencë mjekësore. Në disa raste shfaqen edhe ndryshime në sy – si exophthalmos, ku sytë duken të zgjeruar dhe të dalë jashtë.

Familja Jonë: Si qëndron rreziku nga noduset apo kanceri i tiroides?

Dr. Almedin Ramizi: Nëse kemi të bëjmë me noduse malinje ose kancer të tiroides, ka rrezik që ato të përhapen në qafë, mushkëri apo organe të tjera. Po ashtu, noduset e mëdhenj mund të ushtrojnë presion në fyt, duke sjellë vështirësi në frymëmarrje apo gëlltitje. Prandaj është thelbësore që çdo nodus të vlerësohet me kujdes.