Dy persona janë arrestuar në Fushë Kosovë, pasi të njëjtit dyshohet se kanë kryer grabitje në një market.

Sipas Policisë, te njëri prej të dyshuarve është gjetur dhe sekuestruar një revole e tipit TT.

Në raportin e Policisë është thënë se të dyshuarit kanë tentuar të kryejnë grabitjen nën kërcënimin e kësaj arme.

Sipas njoftimit të Policisë, ngjarja ka ndodhur në rrugën “Tahir Zemaj” rreth orës 11:00.

“Sot, rreth orës 11:00, është raportuar për një tentim grabitje në një market në rrugën “Tahir Zemaj”, në Fushë Kosovë, ku dy persona të dyshuar kanë tentuar të kryejnë një grabitje nën kërcënimin e armës”, ka thënë Policia.

Të dyshuarit A.A. dhe U.A., me vendim të prokurorit,  janë dërguar në mbajtje.