Nga tash e tutje, edhe fëmijët e moshës 12 deir në 15 vjeç do të mund të marrin vaksinën kundër COVID-19.

Ministria e Shëndetësisë ka njoftuar të martën se ka miratuar rekomandimin e Komitetit për imunizim kundër COVID-19 për vaksinimin e fëmijëve të moshës 12-15 vjeç (pa indikacione shëndetësore) me vaksinën Pfizer BioNTech, siç thuhet me kërkesë dhe vullnet të prindit apo kujdestarit ligjor.

“Vaksinimi i kësaj grup-moshe mund të bëhet në të gjitha qendrat e vaksinimit kundër COVID-19 në Kosovë, vetëm në prani të prindit apo kujdestarit ligjor.

Për vaksinimin e fëmijëve të kësaj grup-moshe, prindërit e tyre ose kujdestarët ligjor nuk kanë nevojë të caktojnë paraprakisht termin, por vetëm të paraqiten në qendrën e vaksinimit në komunën përkatëse”, thuhet në njoftimin e MSH-së.

Sipas MSH-së, ky vendim është bazuar në rekomandimet e EMA-s, FDA-së, CDC-së dhe në praktikat e shumë shteteve, të cilat deri tash kanë arritur shkallë të konsiderueshme të vaksinimit të fëmijëve të kësaj moshe me vaksinën kundër COVID-19.

“Përvojat nga shtetet që kanë nisur aplikimin e vaksinës të grup-mosha 12-15 vjeçe, flasin për siguri dhe efikasitet të lartë të kësaj vaksine edhe tek fëmijët, duke i mbrojtur ata nga të gjitha variantet e SARS-COV-2, përderisa efektet e mundshme anësore janë të pa përfillshme në raport me përfitimet nga vaksinimi”, thuhet në njoftim.

Deri tash ka qenë i lejuar vaksinimi i grup-moshës 12-15 vjeç me indikacione shëndetësore dhe i të gjithë qytetarëve të moshës mbi 16 vjeç.

“Ministria i inkurajon prindërit që t’i vaksinojnë fëmijët e tyre kundër COVID-19, si mënyrën më të sigurt për parandalimin e infeksionit COVID-19 në mesin e fëmijëve”, thuhet tutje në njoftim.