Koha ka ardhur. Keni marrë vendimin për të ndërprerë ushqyerjen me gji, luftoni me ndjenja të ndryshme (gjë që është krejtësisht normale), por në të njëjtën kohë e dini se edhe fëmija juaj edhe ju jeni gati për këtë hap

Pavarësisht nëse fëmija juaj është disa muajsh ose disa vjeç, ne besojmë se ky është një vendim që ju e keni menduar mirë, dhe në vijim ju sjellim disa këshilla për t’ju ndihmuar që ta bëni procesin sa më të këndshëm.

Duhet të mbani në mend se ky është një vendim që shqetëson vetëm ju dhe foshnjën tuaj dhe, natyrisht, është mirë të keni mbështetjen e anëtarëve të tjerë të familjes, pa marrë parasysh se në cilën kohë vendosni të ndaloni ushqyerjen me gji.

Në rastin ideal, ndërprerja e të ushqyerit me gji është një proces që zgjat nga disa javë deri në disa muaj:

1. Eliminoni një vakt

Nëse ju duhet t’i ktheheni punës dhe ushqeni beben tuaj me gji, kjo do të rezultojë e lodhshme. Ju mund të tërhiqni qumësht me pompë dhe ta vendosni atë në frigorifer, me qëllim që personi që kujdeset për fëmijën tuaj ta ushqejë gjatë mungesës suaj në shtëpi, por nëse do t’ju duhet të zgjoheni herët në mëngjes, ushqyerja me gji gjatë natës do të jetë mjaft e lodhshme për ju, prandaj mund të filloni të ndërprisni dhënien e gjirit gjatë natës.

2. Informohuni për pasojat e ndërprerjes së gjirit

Disa mendojnë se me ndërprerjen e gjirit fëmija do të flejë më rehat gjatë natës. Duhet të dini se fëmija, edhe pse do t’i ndërprisni gjirin, do të vazhdojë të zgjohet natën duke ju kërkuar vazhdimisht dhe ju duhet të keni durim ta qetësoni. Gjithashtu, duhet të dini se fëmijët që ushqehen me qumësht artificial vuajnë më shumë nga kapsllëku se fëmijët që ushqehen me qumësht gjiri.

3. Ndërpriteni dalëngadalë

Pavarësisht motivit që po ndërprisni gjidhënien, duhet ta bëni dalëngadalë për dy arsye:

– Bllokimin e gjëndrave të qumështit. Nëse e ndërprisni menjëherë ato do të bllokohen duke rrezikuar kështu krijimin e mastitit në gjoks, prandaj është më mirë ta ndërprisni gradualisht. Nëse nga një vakt në tjetrin shikoni se gjoksi tejmbushet, shtrydheni me dorë dhe mos i jepni të pijë.

– Evitimin e vuajtjes të bebes. Nëse e ndërprisni menjëherë gjidhënien, bebi juaj do të vuajë më shumë në krahasim me atë dalëngadalë. Ndërprisni në fillim vaktet e panevojshme, jepini fëmijës ato më kryesoret. Nuk duhet t’i jepni të pijë kur e shikoni që nuk ka uri, por thjesht do të “luajë”.

4. Gjumi

Momentet më të vështira janë ato para gjumit dhe gjatë natës. Nëse keni mundësi t’ju ndihmojë dikush për ta vënë në gjumë, do të jetë më e lehtë për ju. Nëse ju ka pranë, fëmija nuk mund të rrijë pa kërkuar të futet në gjoks.

5. Mos i ofroni gjoksin nëse nuk e kërkon

Shpesh për të qetësuar fëmijën, shumë nga ju i ofrojnë gjoksin, edhe pse fëmija në ato momente mund të mos jetë i interesuar. Kjo nuk duhet bërë nëse keni vendosur të ndërprisni gjidhënien, pasi duke mos ia ofruar gjoksin kur nuk e kërkon, do të kuptoni kështu cilat janë vaktet kur ai vërtet ka nevojë të pijë për uri.