Bashkësia Islame e Kosovës, përmes një njoftimi, ka bërë të ditur se nesër në xhamia do të falet vetëm namazi i Fitër Bajramit për shkak të situatës me pandeminë COVID-19.

“Për shkak të gjendjes pandemike në xhamitë e vendit nuk do të ketë manifestim tradicional, madje edhe namazi i sabahut do të falet nëpër shtëpi, e në xhamia do të falet vetëm namazi i Fitër Bajramit. Falja e namazit të Fitër Bajramit do të bëhet në orën 05:53, ndërsa xhamitë do të hapen vetëm 15 minuta para faljes së namazit të Bajramit”, thuhet në njoftim.

Kërkohet nga besimtarët që gjatë faljes së namazit të Fitër Bajramit të ruajnë distancën fizike dhe të respektojnë masat kundër COVID-19.

Hytben e Fitër Bajramit në Xhaminë e Madhe në Prishtinë do ta mbajë myftiu i Kosovës, Naim ef. Tërnava, i cili do t’u drejtohet opinionit të gjerë me një mesazh të shkurtë për këtë festë. Po ashtu, për shkak të gjendjes pandemike, myftiu i Kosovës nuk do të organizoj pritjen tradicionale të festës së Fitër Bajramit.

Kryesia e Bashkësisë Islame të Kosovës të gjithë besimtarëve dhe opinionit të gjerë ua uron festën e Fitër Bajramit, duke e lutur Zotin që t’i ketë pranuar agjërimin, lutjet dhe ibadetet tona.