Kryetari i shoqatës së teknikve të radiologjisë së Kosoves, Mustafë Buzoku, merr pjesë në Kongresin e 6-të dhe në shënimin e 70 vjetorit të Shoqatës Sllovene të Radiografëve në Portoroz.
Këtë e ka bërë të ditur ai përmes një postimi në facebook.
Ai është shprehur se kjo pjesëmarrje ishte privilegj dhe nder për të, ngjarje e cila ndihmon në krijimin e lidhjeve të radiologëve në rajonin e Ballkanit.
Postimi i plotë:
‘Me ftesë të Dr. Nejc Mekis, së bashku me koordinatoren për BE, Ensara Haliti, morëm pjesë në Kongresin e 6-të dhe në shënimin e 70-vjetorit të Shoqatës Sllovene të Radiografëve në Portoroz.
Ishte nder dhe privilegj të ishim pjesë e një ngjarjeje kaq të rëndësishme – e cila nxitë dhe inkurajon krijimin e lidhjeve dhe partneriteteve të mëtutjeshme në rajonin e Ballkanit.
Gjatë kësaj vizite zyrtare, kishim kënaqësinë të takojmë shumë profesionistë të ndryshëm të radiografisë dhe të ndjekim ligjërata nga ekspertë të njohur të kësaj fushe. Ligjëratat e CEO – Altino Cunha dhe Presidentin e Federatës Evropiane të Shoqatave të Radiografëve (EFRS), Andrew England –në lidhje me Trajnimin dhe Rolin e Radiografit në Evropë, ishin tejet të frytshme.
Përvoja e tyre e çmuar nxori në pah gjendjen aktuale të arsimit dhe praktikës së radiografisë në të gjithë Evropën, duke theksuar zona kyçe për zhvillim dhe bashkëpunim. Prezantimet përmbajtësore dhe mundësitë e rrjetëzimit ofruan perspektiva të çmuara dhe të rëndësishme që pa dyshim janë me vlerë për shoqatën tonë, kolegjin AAB dhe komunitetin e radiografisë në Kosovë.
Kjo ftesë, mbi të gjitha, përfaqëson frymën e bashkëpunimit dhe solidaritetit ndër-shtetëror, që janë të rëndësishme në avancimin e qëllimeve tona të përbashkëta në fushën e radiografisë. Tani, edhe zyrtarisht, është hapur dera për bashkëpunim, shkëmbim të njohurive dhe partneritet të qëndrueshëm. Iniciativat e tilla mundësojnë të punojmë së bashku për zhvillim profesional dhe avancim të radiografisë në tërësi.
Thellësisht mirënjohës për mikpritjen e ngrohtë gjatë kohës që kaluam në këtë Kongres. Profesionalizmi dhe zemërgjerësia e komitetit organizativ kontribuan që kjo përvojë vërtet të jetë e paharrueshme.’
