Rreth 5,800 shtrime në spital nga bronkioliti u shmangën në Francë falë ilaçit të ri parandalues me substancë aktive nirsevimab, ka njoftuar Shëndeti Publik në Francë.
Agjencia shëndetësore citoi dy studime që treguan se antitrupi, i cili tregtohet me emrin Beyfortus, ishte efektiv në parandalimin e rasteve të rënda të sëmundjes tek të porsalindurit të shkaktuar nga virusi sincicial i frymëmarrjes (RSV), raporton Euronews Health.
Virusi i zakonshëm i frymëmarrjes shkakton simptoma të ngjashme me ftohjen, por mund të jetë i rrezikshëm për të sapolindurit dhe të moshuarit. Është shkaku kryesor i shtrimit në spitalin pediatrik në Evropë.
Rastet e virusit u rritën pas pandemisë COVID-19, me një epidemi të trefishtë të RSV, COVID-19 dhe gripit që qarkullojnë në shumë vende.
Beyfortus, një antitrup monoklonal i miratuar në Evropë në fund të vitit 2022, iu ofrua të sapolindurve në Francë duke filluar nga shtatori 2023 si pjesë e një fushate parandaluese.
Por qeveria u përball me kritika të rënda pasi kërkesa për antitrupa ishte shumë më e lartë se sa pritej.
Ilaçi jepet si një injeksion i vetëm në lindje. Substanca aktive, nirsevimab, është një lloj proteine që lidhet me një proteinë specifike RSV për të neutralizuar virusin.
Në Francë, bronkioliti vlerësohet të prekë pothuajse 30 për qind të të porsalindurve nën dy vjeç çdo vit, me dy deri në tre për qind të të porsalindurve nën një vjeç që shtrohen në spital për të.
Dy studime franceze përshkruajnë efikasitetin e Beyfortus
Shëndeti Publik në Francë tha se një studim i kryer nga agjencia në bashkëpunim me Institutin Pasteur me bazë në Paris, zbuloi se ilaçi Beyfortus ishte midis 75.9 dhe 80.6 për qind efektiv në parandalimin e gjendjes me RSV të rëndë që kërkon shtrimin në spital për të sapolindurit. Kjo ishte e ngjashme me rezultatet e provave klinike të fazës III.
“Ne ishim në gjendje të vlerësonim në një kohë shumë të shkurtër efektet pozitive në jetën reale të nirsevimab (Beyfortus) në shëndetin e foshnjave, me efektivitetin e trajtimit të vlerësuar midis 76% dhe 81%,” tha Isabelle Parent du Chatelet, shefja e Departamentit të Infeksioneve të Frymëmarrjes dhe Njësia e Vaksinimit në Shëndetin Publik në Francë.
Një studim i dytë përcaktoi, duke përdorur një model matematikor se midis shtatorit 2023 dhe shkurtit 2024, nirsevimab parandaloi 5,800 shtrime në spital, përfshirë 4,200 për të porsalindurit deri në dy muajsh.
“Të dy studimet përdorin qasje të ndryshme. Njëri analizon të dhënat në kohë reale në njësitë e kujdesit intensiv pediatrik ndërsa tjetri modelon të dhënat e mbikëqyrjes në popullatë,” tha në një deklaratë Simon Cauchemez, kreu i modelimit matematikor të sëmundjeve infektive në Institutin Pasteur.
“Por ato rezultojnë në llogaritje të ngjashme të efektivitetit të ilaçit nirsevimab,” shtoi ai.
